新疆盛產哈密瓜、羊肉，甚麼全羊宴、羊奶凍、羊奶片吃到慣聽到厭。今日推介反傳統新疆菜，牛腩代替羊肉，用當造時令哈密瓜入饌，創製出聞所未聞的哈密瓜炸牛腩，兩者九唔搭八但又出奇地夾，其他創意羊排菜亦過癮，不再烚或燒，玩焗玩吉列，務求要你吃出新滋味。
記者：陳冰麗
攝影：伍慶泉、周旭文
模特兒：Carrie
睇埋裝修
破格菜反應熱烈
酷熱警告又再出現！夏日炎炎胃口欠奉，「大漠」總廚金師傅深明此理，Out走主角燥熱羊肉，再用新疆盛產的時令水果哈密瓜入饌，用甚麼肉類頂替羊肉呢？答案是──牛腩！這道破格的哈密瓜炸牛腩推出不足2星期，反應相當熱烈：「試過有客人專登由元朗揸車嚟，指定要試呢個新菜。」其實新菜最初構思用羊肉，但羊肉太搶味，炸煮會變嚡；牛肉與牛冧肉（頸肩肉）味道雖然夾哈密瓜，但炸之前要燜，燜過後再炸肉質又會變嚡；牛柳則過腍，燜完會縮愈縮愈韌口：「最後決定用牛腩，燜完重可保持到嫩滑，再炸都無問題。」
反傳統煮羊肉
金師傅曾到新疆當地的餐廳學藝，由學徒做起，一般新疆菜現已難不倒他，不過他不為傳統影響，反而加入新元素炮製傳統羊肉菜：「地道新疆菜偏辣偏鹹，食法唔係烚就係燒，獨沽呢幾味貪新鮮嘅港人一定唔Buy。」他取孜然、辣椒粉、芫荽粉等新疆常用香料醃製羊肉，改良烹調手法，創製出吉列外蒙草羊排及重量級塞外風味燒羊排骨，前者吉列食法，後者半煎半焗，不再獨沽一味烚或燒，兩種吃法，風味截然不同！
夏日水果菜
哈密瓜炸牛腩
選熟透哈密瓜，切片，夾燜至入味的牛腩，蘸脆漿炸至香噴噴。老實賣相一般，但入口先有脆漿的鬆脆，再有哈密瓜的香甜，最後是牛腩的鮮香，牛腩沒想像中乾身，好腍滑，哈密瓜的香甜能減少牛腩的肥膩感。
美人瓜海鮮炒飯
海鮮有石斑、鮮蝦、帶子、墨魚仔、魷魚、蟹柳，飯用煙韌及爽身印度米，飯與海鮮先炒至8成熟，加入甜美台灣黑美人西瓜快兜後焗多1分鐘，粒粒米也有鮮果味好醒胃。
鮮雜果炒鴨胸
鴨胸先用新疆紅酒、小茴粉、大茴、果實、肉桂等多種香料醃6小時，燒至3成熟切薄片，再混當造荔枝、龍眼、菠蘿、西瓜和哈密瓜炒，鴨胸吸盡鮮果香甜，更清爽滋味。
孔雀河烤魚伴吐魯番金瓜
孔雀河乃新疆一條河，盛產河鮮，但因鰂魚多骨，故金師傅改用肉厚骨少的盲鰽魚，原條起骨用鹽、胡椒粉、白酒醃6小時，再加孜然粉、芫荽粉等香料去烤，香味濃郁盲鰽肥美，再啖一粒炸過的吐魯番金瓜（哈密瓜），口感清新。
新疆常用香料
食客有Say
創意羊排菜
吉列外蒙草羊排
外蒙草羊較羶，肉質較薄，宜炸煮，炸過後的羊排不但減少羶味，亦可封起肉汁，外脆內軟好易咬。
重量級塞外風味燒羊排骨
2磅半羊排骨，用新疆香料醃6小時煎至半生熟封住肉汁，再焗至全熟配秘製BBQ醬吃，記者本不好羊排，也禁不住連吃兩件。
大漠（27144483）
地址：土瓜灣北帝街27號C地下
座位：39個
營業時間：星期一至四12:00nn至3:00pm，6:00pm至11:30pm；
星期五、六、日及公眾假期12:00nn至3:00pm，6:00pm至12:00mn