唔係嘛！兩蚊雞﹖師奶黨執到笑
咪以為香港經濟日漸復甦，物價通脹就係必然嘅事！其實喺香港，賣平嘢始終最有市場，睇吓$10蚊店成行成市就知啦！不過中途悄悄殺出咗$2店頂爛市，幫襯的大部份係師奶黨！呢啲$2店有啲屬同一個老闆，有啲就玩跟風喺雜貨店加插$2專區。記者將呢啲$2貨喺街頭畀人估價，個個都估唔到賣兩蚊雞咁平！
記者：黃藹瑩
攝影：陳智良
Models：Bianca、Carrie
靠聲認店！行過都唔知
兩蚊店絕對係正宗靠實力的店舖，舖頭門面可以話毫不起眼，連招牌都冇個，差啲行過咗都唔知！不過兩蚊店入面有把聲不斷播放：「埋嚟睇睇，全店貨物都係兩蚊咋，兩蚊咋，平勻全港九，快啲埋嚟睇吓啦……」呢把女聲一定會令你知道佢嘅存在！
點解可以賣咁平？
呢個唔單止係你的疑問，相信所有人都好想知道。不願上鏡的老闆劉生話，搞呢兩間兩蚊店（北角同土瓜灣）好辛苦，貨品成本其實好高（係咪㗎？），同埋要靠比市面平租的「短期租約」先挨得住，所以要賺錢只能係靠薄利多銷。
記者問劉生點解唔搞吓特約經銷式的連鎖店，他一再強調其他人想搞同類型的舖頭，會有一定難度！原因係佢哋自己入貨的貨源都好複雜，其他人根本冇可能有同樣的渠道攞貨（真係咁勁？）。當然，劉生亦唔否認其實部份貨品是從內地入貨。
地址：土瓜灣馬頭圍道與拱北街交界處
地址：北角糖水街
$2筍貨逐個捉
顏色水筆
老實講，$2一排顏色水筆用一、兩次都抵啦，你話係咪？
洗頭水
斷估用咗都唔會甩頭髮的洗頭水，帶去旅行反而唔錯呀。
啤牌
$2的啤牌可能冇咁靚，但7-Eleven一盒啤牌都賣成廿幾蚊啦，用完即棄絕對值得考慮。
變腳插頭
呢個係旅行必備，市面多數賣$10，$2就不妨一博。
針線筒
$2就有齊12種顏色的線、穿針器同軟尺，你重想點？
水杯
講真，相信冇人會睇得出$10同$2的水杯有咩分別，咁點解唔買個平的呢？
洗衣粉
又係去旅行Fit晒，你唔會帶靚衫去旅行洗啩？一於買平嘅洗衣粉啦！
Marker水筆
文具絕對係兩蚊店的煞食Item，學生哥，開學前不妨嚟逛逛！
街頭估價：100％估錯！
「唔係嘛？真係賣2蚊咁平？」呢句係小記拎住購自兩蚊店的貨品在街頭進行估價測試時得到最多的反應，整個估價測試總共問咗十幾個街頭人，但估錯價錢的百分比係100%，即睇街頭估價情況！
Emily（顏色水筆）估價$10
我覺得叫我特登估幾錢，件貨反而一定係好平，我估$10！
Tracy（針線筒）估價$15
有齊晒針線同軟尺，起碼都要$15啦！
Yan（洗面膏）估價$25
洗得面我諗點都要廿蚊，重有羊胎素成份喎！
Karen（唇彩）估價$29
我見過類似的唇彩在莎莎賣都要廿幾蚊啦！
Bonita（Marker筆）估價$7
一支Marker唔會好貴啫，頂盡$7囉。
Yvonne（潤唇膏）估價$16
好似有牌子喎，超級市場都賣十幾蚊啦。
陳太（洗頭水）估價$12
咁大支，超市特價都要廿幾蚊啦，不過呢支唔知咩牌子，我估會平啲。
May（染髮劑）估價$30
染髮劑最平都要$40-$60啦，我唔信會太平。
平到你唔敢用！
全店兩蚊的確好鬼平，不過平還平，你敢唔敢用又係另一回事！皆因搽喺個頭同塊面的產品都係小心啲選擇好，用完之後有咩敏感皮膚病就要後果自負啦！兩蚊店的貨品絕對冇顧客保障，要告佢都未必成功。
羊胎素洗面膏
$2一支洗面膏雖然真係好平，但對好多愛美嘅女士嚟講要用的話真係要付出好大嘅勇氣。
VOV唇彩
卓越都有支一模一樣的唇彩發售，重話來自韓國。不過搞笑在購自兩蚊店的反而有個膠Packing，價錢相差成10倍。
黑色染髮劑
$50一支購自大型連鎖店的日本染髮劑都有人會敏感啦，何況係$2一支的染髮劑？來自內地，你敢嘗試嘛？