寰亞同內地嘅華誼兄弟公司合作投資嘅《夜宴》會喺九月開拍，呢部古裝搞笑戲，投資大約一千萬美金（約七千八百萬港元）。導演馮小剛已經落實晒演出人選，章子怡、周迅、吳彥祖、葛優都會參與演出。
強勁編劇班底
今次部戲嘅劇本搵咗名編劇邱剛健嚟寫第一稿，跟住就搵埋劇集《走向共和》嘅編劇盛和裕寫第二稿。角色方面，葛優會扮演皇帝，章子怡做皇后，太子係吳彥祖，周迅就扮太子嘅情人。部戲嘅故事背景發生喺五代十國嘅戰亂時期，古仔有啲似《王子復仇記》，成部戲嘅高潮係煞科嗰場夜宴場面，皇帝同君臣之間各懷鬼胎，都想借呢餐飯嚟消滅對手，但最後係冇勝利者。