美股繼續造好，港股亦蠢蠢欲動，但升至14220之前已回頭，午後更一度插至14094，其後反彈回14146收市，只跌10點，成交175.75億元。
和黃（013）就好威猛，全日成交勁過滙控（005)，達21億元，股價升0.84%至72元，大摩撐場真係零舍唔同。
高盛唱淡中海發展
中海發展（1138）早前話與母公司合併乾貨輪業務，兼計劃分拆有關業務上市。一般而言，分拆業務上市都屬利好消息，但俾高盛搵到藉口唱淡，理由係一旦分拆乾貨輪業務上市，中海發展會變成乾貨輪業務的控股公司，令市場對中海發展的估值打折扣。中海發展股價再跌2.73%至5.35元。
森信紙業（731）派成績表，今年3月底止年度純利5658萬元。雖然增長只得7%，但每股盈利有0.132元，每股派末期息3仙，都算不俗，但股價仍大跌19.35%至0.75元，往績PE降至5.7倍。
黑客話，近排發生泰興光學（389）事件後，投資者及芬佬對工業股特別有戒心，若見股價早已大幅炒高，雖傳出利好消息，都不宜高追，因為隨時會有大戶借好消息出貨，一旦基金離場，工業股的成交便會轉趨淡靜，到時想沽貨止蝕亦唔容易。
彩星集團（635）午後大跌16.43%，以1.22元收市，成交6670萬元。莫非有芬佬散貨？黑客話唔係，應該與斬倉活動有關，若非此股乃基金愛股兼有人維持秩序，相信跌幅唔止咁細。
建滔跌破配股價
建滔化工（148）噚日沽壓加強，終於跌破配股價，低見22.05元，收報22.10元，跌1.33%，成交達3326萬元。
阿虎