從美國回來的友人跟我拗究竟《強戰世界》好唔好睇，「其實我覺得OK嗰喎，喂，個古仔已經寫咗成百年，拍得算唔錯，重好忠於原著㖭。」這是友人的理據。「冇得傾，鬼叫佢係史匹堡，所以我哋一定要求高，重有係你哋喺美國住開嘅先知原著故事係點，我入場就淨係想被娛樂。一百年前就梗係齋聽到有外星人，經已開心到拍枱拍櫈啦，但係今時今日講外星人襲地球，如果超越唔到1996年嘅《IndependenceDay》，就點都講唔上有成就。最後，唔好同我講點樣忠於原著，如果原著好睇你咪忠到夠囉，如果唔係就真係要諗多啲花臣，我畀錢入戲院唔係淨係為咗夾錢畀導演忠於原著。」這是我的看法。
「咁個結局又真係唔夠喉咗啲嘅，」友人的口氣有點鬆動，「你估史匹堡知唔知有事嘅吖嗱？」另一位友人這時才開腔，他是香港一位非常紅的男演員：「史匹堡知唔知我就唔知，湯告魯斯就一定知，你睇佢呢排恍如唔要命咁去做宣傳就知啦，平時cool到爆，但係最近又喺清談節目彈上梳化紮紮跳，攬完女友錫又攬史匹堡錫，又俾人顏射，又在電視上洋洋灑灑大談自己信奉的Scientology，雖然惹來批評聲音，但人氣卻真的是一時無兩，你話唔係一項救亡工作係乜？」我和美國回來旳友人聽罷紅星以幕前人角度的分析後，諗深一層，同時點頭說聲：「係喎！」唔怪得靚佬湯呢期咁搏命啦，明白晒。