中原噚日喺萬豪酒店搞酒會，慶祝成立二十八周年，埸面好熱鬧，唔少發展商高層都畀面到場恭賀。
由於中原計劃出免費報紙，剛剛打響頭炮嘅星島《頭條日報》，自然成為大家追問嘅熱門話題。中原主席施永青話，份報紙都幾好，乜都有齊，娛樂重特別多㖭，但啲相就寫番個來源會好啲。
佢又質疑有冇印到四十萬份咁多，皆因佢收到料話，兩間印刷廠有間未開工。佢重問蘭西，近排報業人手係咪好緊，但當佢俾人影相嗰陣，又笑笑口話唔係想挖角喎。
長實集團執行董事趙國雄就好風騷咁戴住黑超，帶齊全班售樓部經理出席。新地都派出四五個高層到埸，其公司策劃及投資總經理麥力強就更係稀客，事關自從佢由野村證券過檔新地之後，都冇乜露過面。
噚日蘭西喺會場重見到施生同一個大師寒暄，原來係中記一個客嘅朋友，但施生作風一向開放，一定「百無禁忌」。
電郵地址：[email protected]