名模樂基兒去年十月大方承認隆胸，當時她曾笑言隨時會「攞番出嚟」，昨日她為香港時裝節行騷時果然平胸再現，更坦承早前已入院做手術取出胸前植入物，並指作此決定是因為隆胸後負荷太大，出現腰痛及寒背的問題，又笑言以後不會再做任何整形手術。
去年十月名模樂基兒勇敢承認隆胸，透露上圍由32A激升至34C，自此事業發展更見一帆風順，而她的坦白更獲得不少圈中人如李嘉欣等大讚，不過樂基兒當時指隆胸理由是貪玩，更笑言隨時可能「攞番出嚟」，更說：「可能下季我又變番平。」沒想到她近日果然把假胸拆除，回復本來的平胸身材。
負擔太重
回復正常開心番晒
剛由美國探親返港的樂基兒，昨日往灣仔會展為香港時裝節行騷，示範一套白色鬆身新裝，絲毫沒有「波濤洶湧」的效果，完騷後她接受記者訪問，初時只大談美國之行，其後她竟主動問在場記者：「冇嘢問嗱？」隨即瞄向自己的胸部說：「𠵱家backtonormal（回復正常）啦，回復以前嘅size。」
記者問樂基兒為何會做出拆除假胸的決定，及手術過程會否痛苦時，她說：「因為隆咗之後負擔太大，而且我一出世已經唔夠鈣質，成日背痛，重出現寒背同腰痛嘅情形㖭，𠵱家開心番晒，又一啲都冇影響工作，我對回復以前身形好滿意，我以後都唔會再做呢類手術。」
慳番一筆
舊胸圍未丟可重用
樂基兒又笑言幸好沒有丟掉隆胸前所用的胸圍，反而隆胸後只買了黑色及肉色兩個新胸圍，所以現在不必再重新購買胸圍。
記者昨日致電關嘉美醫生，詢問她有關隆胸後又再取出植入物，前後共做兩次手術的風險大不大，及對身體有沒有不良影響等問題時，關醫生即精靈地反問：「係唔係樂基兒呀？呢個女仔真係坦白又決斷，好多模特兒因為職業需要，Bcup或者Ccup都嫌唔夠，其實乳房大亦有大嘅煩惱，除咗重之外，重會有背痛、胸痛同腰痛情形出現，好多病人覺得胸痛就以為生cancer，所以做手術攞番出嚟。」
勝在年輕
肌肉彈性佳復原快
問關醫生從胸部取出隆胸植入物的風險大不大？她說：「其實隆胸係一種好普通嘅手術，都係先做局部麻醉，一般矯形診所都可以做，不過整容醫生嘅意見當然係愈少疤痕愈好，通常都會喺隆胸時開刀嗰個位攞番出嚟。樂基兒咁後生，隆咗胸又唔係好耐，肌肉同脂肪彈性重好好，會復原得好快，相反如果隆咗十幾年先攞番出嚟，撐大咗皮膚，嗰時就會鬆弛同皺皮啦。」
採訪：顏英儀、林妙萍
攝影：陳慧安
