近排日日都有二三線基金股被洗倉，小初真係睇到心寒。繼前日中意控股（1198）急跌後，噚日又輪到彩星集團（635），「忍者龜」昨日最低見1.13元，收1.22元，大跌16.44％，成交股數5278萬股，金額6669萬元。
彩星隻公司輪407跌得重厲害，跌成38.93%，收0.171元，成交高達1151萬份。經紀黃話，呢排佢哋啲行家最鍾意估邊間公司係下一隻被洗倉。小初真係唔明白，就算芬佬要沽貨，亦唔使唔問價咁沽，真係好易嚇親人。唔通跌得咁急對佢哋有着數？
另外，配完股後股價勁跌的華藝銅業（559），經管理層多番向公眾解畫後，股價仍然冇起色。經紀陳話收到華藝的邀請信，請一眾證券界人士周五到東莞睇廠，兼且由管理層再同大家解多一次畫。
華藝以每股0.88元配股後，股價在短短幾日內，由0.90元樓上跌到家陣0.30元附近，貨源已經掟到散晒，兼且叫人失去信心，雖然搞睇廠活動或者會改善投資者信心，但就唔知對股價有幾大幫助。
慕容小初