無綫劇集《我的野蠻奶奶》雖尚未播出，但汪明荃（阿姐）和胡杏兒扮超人大戰哥斯拉的搞笑宣傳片，已令人留下深刻印象。昨日《我》劇一眾演員出席記者會時，奶奶汪阿姐更用藤條打鬧新抱胡杏兒，場面搞笑！
由汪明荃、胡杏兒、伍詠薇、黃宗澤和姚瑩瑩主演的無綫劇集《我的野蠻奶奶》將緊接《奪命真夫》於下周一推出，昨日一眾《我》劇演員在香港仔珍寶海鮮舫出席記者會。
婚後遷就奶奶
汪阿姐在劇中扮演惡死奶奶，對新抱胡杏兒萬般挑剔，汪阿姐昨日在記者會上亦投入角色，不停挑釁胡杏兒，不但叫胡杏兒戲中花名「鐵嘴雞」，又用藤條打她，及後更鬆踭叫胡杏兒行開。而杏兒亦不執輸，當她斟茶給阿姐時，叮囑阿姐要「小心用茶」，實行針鋒相對，場面搞笑。及後汪阿姐又向胡杏兒訓示和宣讀家規，還送上「三寶」，包括繡花鞋、樹枝樹葉和藤條，要杏兒跪地收禮。
對於阿姐戲內戲外均十分嚴厲，問胡杏兒怕不怕？她說：「大家都入晒角色，真係玩得好開心。呢套劇入面阿姐會有全新面孔，只要做好本份，唔遲到同讀好劇本都冇乜嘢，佢都好好玩。而現實生活中，第時我對奶奶會好好，老人家係要就吓。」
黃宗澤rap甩嘴
而汪阿姐、胡杏兒和黃宗澤合唱《我》劇主題曲，當中還有rap的部分，笑言自己穿了戲服便猶如奶奶上身的阿姐說：「呢套戲題材新鮮，連宣傳都做得好搞笑，係超人打怪獸，我覺得主題曲都好得意。」對於胡杏兒希望該劇能拍續集，阿姐說：「睇吓收視點先，最重要係口碑。」現場演繹主題曲時，黃宗澤卻甩嘴，他說：「我第一次唱rap，噚晚先知今日要唱，所以少少甩嘴，惟有以笑遮醜。」
此外，伍詠薇談到《奪命真夫》即將大結局，她說：「我喺劇入面最終唔會同林保怡一齊，不過啲報應就好快嚟喇，因為喺新劇入面，阿姐做格格，同我爭男友石修。」
採訪：王連連
攝影：林德雄
