曾俊華因為去咗大連，喺港台事件中暫避一劫，但班議員一定唔會放過佢。廣播處處長朱培慶都猛料，竟然有十幾位高層唔怕秋後算帳企出嚟撐佢，等佢唔使做一個孤獨推銷員，要單對單同政策局隻揪。
八方後來問番港台，先知原來嗰十幾人當中，好幾位係專程請假去晒馬，當中包括楊吉璽、曾智華、孔祥卿、陳耀華、伍家廉同周偉材等。戴健文、梁家永、施永遠同謝志峰就因公事而在場，其餘朱培慶、麥麗貞同韋佩雯屬傳召人物，當然要亮相。
開派對唔瞅唔睬
港台高層一字排開挺老頂，簡直係當新的特首冇到，實在勇氣可嘉，係人都睇到老朱呢鋪成個人豁晒出去，反正煲呔都係當佢冇到啫。何解？話說有次煲呔請傳媒去官邸開派對，人人圍住佢問嘢，煲呔單單唔睬朱培慶，搞到商台陳淑薇唔抵得，出口叫煲呔聽吓朱生問題，認真尷尬。
老朱俾人鍊住條頸，不如博鋪大嘅，得，就希望成個社會嚟一場大辯論，討論吓港台未來去向，好過俾人陰乾；唔得，咪最多俾人調去日本或者新幾內亞做山寨王囉，大家都想睇吓煲呔同橋王許點拆炸彈，搞掂港台呢個冇人想接嘅燙手山芋。
爆料熱線：29290000、27860099
報料傳真：26239278
報料電郵：[email protected]