特區改朝換代，煲呔黃袍加身，許仕仁重返政府做政務司司長，正在蜜月期，最棘手嘅問題應該係西九。
肥龍未接手已經俾人唱，話佢做過新鴻基地產顧問，收咗郭氏兄弟唔少顧問費。新地副主席郭炳江噚日出席一個公開場合，就俾人問到呢個敏感問題，郭炳江話，許司長會唔會偏幫新地，𠵱家重係言之尚早，各位要「觀其行，聽其言」，之後先再評論喎。
肥龍新花朵：豬油糕
新地最終爭唔爭到西九，或者可爭到「幾多」，重係未知之數。不過，西九拆細，益多啲地產商就差唔多已成事實。揼咗唔少錢、重請埋香港記者遊歐洲嘅新地，睇住塊「食硬」嘅肥肉，要分啲畀人，梗有啲「唔老利」，郭炳江話財團做咗好多工夫，莫非係暗示，曾蔭權你搞西九時，我哋真金白銀幫你造勢，斷估就算分豬肉，都分到嚿大嘅吓嘩！
既然𠵱家分豬肉名單未有分曉，八方就講吓另一樣豬。許仕仁外號肥龍，呢個「花朵」由來，八方早前解釋過，但原來肥龍重有一個外號──豬油糕。
肥龍有橋又識撈，所以北京睇得起佢，專程喺商界搵佢返嚟扶助煲呔，做二把手。
同各大黨派打成一片
事實上肥龍嘅交際同處事作風，喺政界中都出晒名，政壇大哥李鵬飛就以豬油糕形容肥龍，話佢好似嚿豬油糕咁，黐𣲷𣲷，滑嘟嘟，又肥又甜，自然可以同各大黨派都打成一片，減輕呢班大帝對煲呔嘅殺傷力。加上澳門手信中，豬油糕好有名，老許有馬交背景，呢個名特別應景。
雖然豬油糕好食，但都有人會敬而遠之，因為膽固醇好高，食得多會又滯又膩，呢一點肥龍要記住，以免令人反胃。
傳真︰2623-9278
電郵︰[email protected]