同王菲合作咗十年嘅音樂人張亞東，嚟緊九月將會以歌手身份推出新專輯，張亞東否認王菲有今日嘅成就係佢嘅功勞，佢日前接受內地記者訪問時話：「她的地位誰也動搖不了，但是她的音樂再也搞不出甚麼變化了。」
張亞東話因為商業因素，唱片公司以往成日強迫王菲唱一啲唔鍾意嘅歌，所以一直唔快樂，不過張亞東又覺得王菲𠵱家喺音樂領域上已經止步。
張亞東話：「我覺得我和王菲在音樂上愈走愈遠，我一直在前進，她停止了。」本來張亞東邀請王菲喺新碟中唱一隻英文歌，但王菲認為同自己聲線唔夾拒絕咗，揀咗另一隻歌唱。
盛讚女友有主見
而張亞東同竇穎分手之後，同電影《青紅》嘅女主角高圓圓拍拖，張亞東話高圓圓係一個好有主見嘅女仔，雖然自己同好多唱片公司都想高圓圓做歌星，但佢始終不為所動，張亞東說：「她認為不適合做的事情，沒有任何人可以強迫她，我就是欣賞她這樣的個性。」