港股又大升，升幅比預期大，恒指升192點，期指更大升256點，美中不足嘅係成交只得168億元，好多人睇唔通，唔敢入市。
大市回升，暫時未有走出上落市嘅範疇，但恒指若能在14000至14300內企多兩三日，中期形勢又會轉好，唔排除會破位而上。事實上，港股上到呢個水平，好淡爭持已愈來愈激烈，家下要睇窩輪發行商點做，但即使佢哋真係要㩒低計價，極其量只係將升市開始嘅時間再推遲一兩個禮拜而已。
大藍籌齊齊發威，滙控（005）收124.2元，升1.2元，長實（001）同和黃（013）收75.05元同71.40元，分別進帳0.95元同1.15元。後市若大升，滙控同長和都會成為火車頭，一波就指下半年息差改善，以及港元滙率及債券轉強，對滙控有利，維持其「優於大市」評級，目標價150元。
另外，大摩報告就指和黃盈利能力強勁及價值吸引，故將其投資評級調高至「增持」，目標價提高至90元。美林報告指內地電訊業重組推遲，以及第3代流動電話推出，有利中移動（941）保持行業競爭優勢，調高其05及06年盈利預測至454.7億元及505億元，目標價由29元調高至36元。大藍籌紛獲大行提高評級同目標價，有助增強投資者信心。
國企回升，國指收4851，升41點，中鋁（2600）同吉化（368）都升約5%，上石化（338）同鞍鋼（347）亦有2.8%進帳。早輪推介伺機低吸的哈爾濱動力（1133），噚日高收2.975元，升0.15元，升幅5.3%，調整完成，升勢再起。
毛利率將顯著改善
哈動上月中升上3.125元後，反覆回落到2.8元水平，提供上佳低吸機會，噚日升破短期下降軌，及重上10日線（2.915元）同20日線（2.949元），上升目標指向3.6元。
哈動一年營業額逾100億元人幣，04年只獲利1.18億元人幣，每股盈利9.9仙，主要係材料價格大升令毛利率下降，但今年情況已有顯著改善，一來鋼材價格回落，二來今年簽訂合同定單價格較高，材料價漲影響轉嫁予客戶，只要毛利率提升一兩個百分點，盈利即可倍計增長。
郭兆誠