在香港崇日唔崇洋，日貨永遠有市場！近日連旅行社都做埋「水貨黨」，為旗下會員提供精選日貨，真係未出發先興奮！根據一個月帶團去足日本三次的導遊Gary和Annie觀察，撇除季季轉款必掃的日牌潮流衣衫鞋履唔講，原來香港人赴日掃貨的口味勁長情，頭三甲必定係AV電玩、化妝品同健康產品。至於今夏最Hit，必搶近期改機改到嘭嘭聲的靚仔3G機！
記者：邵超
攝影：陳盛臣
Models：Melou、Sophie（Zlect）
鳴謝：西田百貨（26941111）
影音電玩界
買3G手機平足一半
港人遊日，掃影音電玩絕不手軟！日本導遊Gary和Annie換手機快過打針，Annie之前在日本上台出咗一部Sharp902SH，機價12,800日圓（約$889.6港元），連埋上台預繳年費、手續費等埋單約20,000日圓（約$1,390港元），加埋返港改機（友情價$200-$400）合計$1,790，重平過在香港買（已改好機的最新海藍色Sharp902SH$3,850），抵！
不過Gary就醒個貼士畀你：在東京、大阪上台出手機要有日本住址證明，但九州或北海道簽信用卡就可以出機！
化妝品界
掃完Fancl+DHC轉搶MIHAWA
日本藥房的化妝品有幾隻牌子低至七折，大部份百零蚊港紙吸引到暈。根據兩位導遊的經驗，Shiseido和Kose長期有人去掃貨，之前港人就最興買平過香港四成的FanclHouseTenseUp，近期興買的DHC在日本平足10%-15%。Annie話如果唔計品牌，現時「深層水」成份的美容產品就最多人買。
健康產品類
超級迷信備長炭
好多香港人鍾意認住「日本厚生省」呢個金漆招牌，加上日本人有好嘢唔鍾意外流，港人惟有去日本狂掃保健產品，而近排最紅一定是備長炭！呢種原產自四國的炭，能夠釋放遠紅外線、阻隔電磁波、吸附雜質、毒素和水份，產品照顧晒日常所需。至於保健產品近排至Hit仍然係藍莓、DHA和胎盤素，Gary說香港人對千零日圓的感冒藥都覺得零舍好食。
港人長情三寶
（1）HelloKitty生活雜貨
估唔到開業九世的日本Hellokittyland，依然是女仔及女人最想去的地方。
NHJMP3（V-P415）
HelloKitty特別版$1,380（a）
（2）寵物用品乜都有
日本人極愛寵物，衍生出相關產品包括時裝、工具、DIY、護理用品等，你無諗過有嘅產品都有。
備長炭寵物按摩滾軸 $40（a）
（3）聰明奶粉
入貨的師奶都話，日本奶粉吃咗聰明啲、又唔燥。
明治奶粉$330（0-12個月）$220（9個月至3歲）（a）
日本水貨舖：我哋會代買
在香港搵最新的日本產品，好多人都習慣走去JCShop。老闆Alan眼光向來好準，經常引入鬼馬又實用的產品，如果你唔係經常去日本，他亦會幫客人訂貨：「有啲客資訊快過我，或者有特別需要，但唔會個個應承入貨。我要睇大眾接唔接受，因為運費令成本增加，齋訂一部會蝕。」他說男仔市場最受影音、電玩，轉款快、多功能和Crossover通常掂硬；相反女仔市場就好穩定，因為她們最受美容和健體產品，要的是品牌和安全感，而且要有選擇。所以同類產品會引入多幾個款，她們通常寧買貴不買平。
去日本想買乜？
日本導遊醒你
港人愛新款
東瀛遊日本導遊Gary：「去遊日本的香港人最想買新手機、新AV、新Game，但睇唔明日文就唔好玩，所以我哋會同團友篩選一些又新又易明的介紹俾佢哋用，佢哋先會覺得過癮。有時客人成日追問某啲產品，或者有舖頭託佢哋買手機、AV，就知道邊種貨香港人最受落。」
代客問㗎妹
東瀛遊日本導遊Annie：「我哋成日帶團，見到最多日本後生仔手上拎緊嘅嘢，肯定係最Hit。好似近排見個個日本妹都揸住HelloKitty超迷你DV，就會上前問吓料。去日本的香港人，比例是男:女=4:6，女仔最鍾意掃化妝品，不過佢哋淨係識香港有分店嘅牌子如Fancl和DHC。」
店舖資料：
（a）EgLJm@art（23151990）
（b）JCShop（31015033）