5毫子，現在跌落坑渠邊你都未必會執，湊夠2個才勉強打到鋪PhotoHunt，祖母向我說：「60年代畀5毫子，買到4両叉燒咯。」現在燒臘檔還有叉燒賣，但那製法複雜的鴨掌包卻幾近消失人間：「鴨掌包都唔知幾好味呀！如果有得食番就好咯……」她沒說謊，記者試過確實惹味，打包給祖母吃，她笑逐顏開，全因味蕾感動，吃回了60年代的真滋味。
記者：周頌堯
攝影：林栢鈞
模特兒：Johnny、Stacie
鳴謝：滿清皇朝（27814998）
歷史短班底老
刻下，除幾間集團式酒家外，獨立經營的傳統粵菜酒樓恍若稀有動物般買少見少，晨早熙攘熱鬧的茶客、傳統龍鳳大禮堂內的金色龍鳳木雕、寫上甚麼「海棠」、「玫瑰」之類廂房名字的大紅嘉賓題名板……通通令人回味。「紫荊閣」開張7年，歷史短但班底老，店鋪前身是派頭十足的「紅寶石酒樓」和「金利閣酒樓」，7年前接手開張，老闆易店名兼換廚房班底，聘用頂盛一時的「運通泰酒樓」一眾熟手粵菜老師傅，得這班老師傅撐腰，食物質素絕對有保證。
師傅碟碟心機菜
談起老師傅，不得不提大廚李師傅和負責燒臘的丘師傅，兩人有超過30年煮粵菜經驗，前者曾在「國際大酒樓」、「統一酒樓」、「格蘭酒店」工作過，閱歷深，他慨歎：「世界變，乜都講個快字，其實慢工先出到細貨嘛！𠵱家好少地方食到六七十年代嘅傳統粵菜咯。」丘師傅年少學點心起家，改當燒味學徒尋到煮食樂趣，一燒30年：「係囉係囉，好似鴨掌包咁，以前賣5毫子，貴價燒味嚟㗎，不過製法太繁複，成本太高喇，𠵱家重邊有酒樓肯整吖？」多得這兩位師傅，年輕一輩如你我未吃過的、上年紀想讓味蕾尋回昔日美味的，才有機會吃到這些三四十年前的懷舊粵菜。
懷舊粵菜（全部1日前預訂）
懷舊鴨掌包 $64
丘師傅：「唔信問你阿媽，60年代茶樓同燒味舖好興㗎﹗」用鵝腸包起叉燒、鴨掌和雞肝，用糖、鹽、玫瑰露與自製叉燒汁醃30分鐘，之後再掛上燒鴨爐用中火燒20分鐘，製法複雜不是家家酒樓肯做。
蜜汁燒雞肝 $38
雞肝用鹽、糖、雞粉、薑、葱醃30分鐘，火候要會揑得準，先用中火後用細火紅燒20分鐘，熱得過火會變老變硬，不夠熱又會出血水，李師傅：「𠵱家某啲燒味店重會做蜜汁燒雞肝，酒樓我就真係好少見咯！」
百鳥歸巢 $108
李師傅：「炸雀巢極之易碎，要花好多心機處理。」為免軟身馬鈴薯互相黏纏，故切絲後先乾水，然後放入筲箕沿筲箕邊壓成鳥巢狀，最後連筲箕一併放入熱油炸，巢內放蜜糖豆、鮮蝦仁、崧子、白鱔粒和炸鵪春蛋，相當豐富。
富貴龍鳳球 $98
此菜是30年前結婚喜宴的必吃熱食前菜，其他場合絕對無機會吃到。「龍」指蝦仁，「鳳」是雞肝，製作同樣花時間，新鮮4吋長海蝦捲起燒好的雞膶片，外層黏生粉放鑊炸1分鐘，最後加自製沙律醬快兜，外脆內香。
清宮御廚雞 $380
此菜學自廣州四大名廚之一高賢師傅，李師傅說：「清朝御菜嚟㗎！當年只有慈禧太后先有資格食！」新鮮雞起骨，把炸過的糯米、火鴨、冬菇、瑤柱一齊放入雞身入鑊蒸30鐘，餡料要放得適量，太多會撐爆雞身、太少雞身太扁賣相不靚。
食客有Say
紫荊閣（26568222）
地址：九龍何文田窩打老道65A至65D地舖
座位：約300個
營業時間：7:00am至11:30pm
