市場認為美國職位增長幅度不足以支持美國息口持續上升,有可能快將見頂,所以美股上周五大升146點,近日受制於息魔的港股,噚日急升192點至14157。期指更被挾高256點,收報14183,高水25點,但成交只得168.11億元,動力似乎不足。
由另一個角度看,美息見頂,反映美國經濟無力再上,最後都會對中港經濟不利,港股升勢唔易維持。
不過,黑客就唔係咁睇,佢話近排由對沖基金話晒事,加上美林與大摩唱好中移動(941)及和黃(013),看來大戶短期要將大市炒上。美林調高中移動目標價至36元,大摩則唱好和黃,目標價90元。和黃將於8月25日公布業績,市傳大戶正部署炒長和業績。
建滔(148)雖然減價至22.25元才配得成股,但總好過配唔成,噚日復牌都預咗會大跌,股價一度跌至22.25元,以22.40元收市,跌10.4%。其實建滔跌唔破配股價已算萬幸,亦即係話在22.25元搵到支持。
新世界吐烏氣
藍籌股之中以新世界(017)升得最勁,全日升5.14%至9.20元,成交達1.11億元。早前荷銀出報告話新世界已到價,叫客戶減持,又話分拆新世界百貨的計劃會延遲,定目標價8元。但新世界立即對外表示,旗下的百貨業已具備分拆上市條件,而系內股份又擬增派股息,支持股價造好,新世界噚日大升,可算吐一口烏氣。
和成(2993)20合1後,由前收市價0.01元變成0.20元1股,大大增加股價下跌空間,結果噚日大跌34.5%至0.131元,不過成交唔多,只得78.04萬元。市場傳出公司部署低價配股,所以唔少炒家都想沽貨。和成曾計劃以每股0.052元(股份合併前)配售30億股,但最終因股價不振而擱置。
阿虎