有啲意外，恒指一彈就係192點，期指更勁，升夠256點，高水26點。中移動（941）與滙控（005）兩大重磅股，帶起恒指87點，佔恒指升幅三分一。
滙控C輪3524：滙控升1.20元，滙控C輪升幅有大有細，最勁嘅3682，彈跳100%，收4.2仙，唔係乾炒，有85球易手，金額都有3球幾。隻輪下月26日最後買賣，行使價130元。正股昨日124.20元，距行使價5.80元。賭唔過嘅理由，係正股唔易上到130元以上。賭得過嘅理由，係偶然間正股忽然有1日彈升兩三元，隻輪就會變火箭，同埋輸晒只係幾個仙咁話。食得鹹魚抵得渴，世上好少有高回報低風險呢種嘢，博大堆必然有高風險。賭3682要預埋輸得乾乾淨淨。
賭滙控C輪，賭得比較實際，可以揀隻3807，數據詳列於左圖。
中銀C輪4760：中銀（2388）升0.10元，收14.60元。C輪4578細細粒，由3仙彈上4.5仙，升幅已經係50%。隻輪剩番10個交易日買賣。炒中銀C輪，可揀4760，10月尾夠鐘，輪價30仙，溢價4.8%，槓桿率48.7倍（有效17.7倍），引伸波幅16.3%。炒嘅話要快手快腳，因住輸在溢價收縮。
章盛