報業大混戰，星島今日推出免費報紙，硬撼《都市日報》同施永青即將出版嘅《am730》。星島主席何柱國（圖左）噚日話，今日起會喺全港六百個地點派發《頭條》，首階段印四十萬份，預計朝早七點開始派，一、兩個鐘就會派晒，佢重話明《頭條》要做第一大免費報紙。
《星島》賣六蚊，《頭條》唔使錢，聽落都覺得對《星島》有影響，但何主席話做過調查，免費報紙係另一個市場，唔會搶傳統報紙嘅生意，即使有影響，最多都係三至四個巴仙。至於廣告方面，亦唔會打減價戰，或者會聯合星島旗下報紙雜誌一齊搵廣告。
雖然係免費報紙，但《頭條》嘅編採隊伍都有廿人，外判派發報紙嘅隊伍有二、三百人，都算幾揼本。
傳真︰2623-9278
電郵︰[email protected]