潮流興結構性產品（structuredproducts），結構性存款、ELN（與股票掛鈎票據）等等大行其道。呢啲產品銷售，大致有兩類：（一）由證券商發行，銀行分行代售；（二）銀行自己設計、發行，由自己分行推銷。因為生意好好，新款產品層出不窮，證券商、銀行笑口常開。
證券Ｗ啱啱去新加坡開會返嚟，佢話碰啱國際奧委會在新加坡開會，五星酒店幾乎全部爆滿，一房難求，好彩佢老早訂咗房，否則好唔掂。新加坡冠蓋雲集，新加坡人好不高興。暗地裏，證券Ｗ被新加坡同行警告，嚴防中航油事件在香港重演。
中航油當年嚟唔到港上市，改咗去新加坡，初初表現好醒，點知去年中航油「炒油」事件穿煲，中航油沽空石油期貨?衍生工具，竟然輸咗幾十億，直情嚇死人。國企公司去到海外，學乜人沽空石油吖，石油期貨市場嘅對手，大鱷雲集，食人不吐骨，中國公司經驗短淺，死梗。
中航油股價在新加坡股市大跌，跟住停牌，然後被逼清盤，CEO被捕。後遺症嚟嘞，原來有金融機構推出一籃子ELN（通常有五隻股票），幾隻股票之中，有一隻係中航油。此類ELN講明，籃子內某隻股票跌多過10.5%，投資者就要接貨。唉吔，中航油輸清，接貨接到中航油喎，你都知會有乜嘢回報嘅啦，牆紙囉！
證券Ｗ聽到，投資者之中，有大戶、有散戶。大戶唔理嘞，散戶就到銀行哭訴：「你哋職員向我推銷ELN，我買咗一萬銀星紙，現在蝕到冇晒，係你呃我唔識，唔知乜嘢叫做ELN……」證券Ｗ一聽就心寒，假如呢類散戶組織上街示威，銀行點算？好彩新加坡冇人敢去上街示威嘅啫，如發生在香港，傳媒就有好戲睇咯。證券Ｗ問新加坡行家：「銀行點應付？」行家神秘微笑咁話：「新加坡人自有新加坡方法！」