煲呔上任後，第一樣要做當然係要搞好特首辦，因為佢最怕名不正，言不順，所以新聞處處長蔡瑩璧一個人做兩份工，佢一定覺得有問題，唔可以接受。八方諗蔡小姐大概都知道煲呔性格同老董唔同，所以將來一搵到人專責做特首辦嘅新聞統籌工作，佢阿姐自會退位讓賢，唔再兼任做特首辦發言人。
有人問黃灝玄可唔可以升任，咁點都可以幫輕吓嘅，至於細當奴陳羿就一定唔得，原來政府好鍾意講排資論輩，細當奴只係D2級，點可以做特首辦發言人？再者，你咁低級，肯定冇人會聽你支笛，做乜都唔靈啦。
煲呔新上場，萬事起頭難，一個唔小心，會俾人話佢繞過立法會，八方聽聞，佢早前重未有時間同細當奴講點分工，不過，隨住多啲人回朝，佢都要講清講楚，日後以邊個講嘅為準，以免誤會。
傳真︰2623-9278
電郵︰[email protected]