唔知係咪泰興（389）效應影響，好多由基金持有的工業股，接連出現股價急跌的情況，繼上周國美（493）同大成生化（809）插水後，噚日又輪到中意控股（1198），最低見過5元，收5.25元，跌12.5％，成交股數159.9萬股，金額844萬元。
由於中意並無壞消息出現，小初於是問經紀黃，可唔可以博反彈？經紀黃話等大芬沽完貨先算。
不過，凡事都有例外，唔少中型基金股仍然硬淨，好似做時裝零售嘅寶姿（589）剛剛出通告，話截至6月30日止，零售分部營業額約2.84億元人民幣，增長27%。有歐資證券行計過條數，估計盈利上升4成。另外，由於寶姿的布料主要來自歐洲，所以歐元下跌對佢有利。
寶姿昨日跌1.59％，收6.20元，成交股數99.55萬股，金額624.7萬元。股價仍然在52周高位徘徊。
寶姿同好多二三線基金股一樣，公眾持股量由少數基金揸住，如果佢哋唔沽嘅話，理論上好難大跌，問題係成交疏難轉身。
慕容小初