究竟係用家定係炒家，有時未必咁易分辨，點解咁講，睇完以下呢單成交咪知囉。
屬於工商綜合物業嘅葵涌永得利廣場，第一座中層三、五及六室，一共六千四百六十五呎，五月尾由用家以約一千一百一十二萬購入，平均每呎一千七百二十。佢諗住將公司分散喺荔枝角嘅幾個部門，搬去永得利廣場集中起嚟。買賣合約寫明交吉交易，但用開嘅租客要到八月至約滿搬走，雙方惟有等啦。
咁啱日籍大業主永得利集團，最近突然決定將永得利廣場第一座全線封盤，市場一下子少咗好多供應。中原方德智話，唔少同行都打電話畀呢個用家，游說佢放盤。由於不勝其煩，佢隨口噏咗個價，諗住冇人肯制，點知竟然有客出到價。佢見咁吸引惟有割愛，以約一千二百三十五萬摸出呢批單位，賺咗一百二十三萬，但自己就無端端變咗炒家嘞。
電郵地址：[email protected]