唔通真係我做錯？呢幾日時晴時雨，醒起老婆大人冇帶雨遮，諗住打個電話畀佢關心吓，點知佢劈頭就話：「我好多嘢做，成日打電話嚟，響公司點方便講電話吖，少啲打嚟呀！」激到我想掟個電話出街！或者真係我太婆媽，太過關心一個人係自私行為，亦都會畀對方壓力，不過佢咁話我，唔知會hurt到我嘅咩？每次佢激親我，我想離家出走，就會整燒鰻魚。響日本認識佢時，餐餐佢都整燒鰻魚飯畀我食，真係燒得好好味。返到嚟香港，我做的是自由工作，比佢得閒，於是變成我燒畀佢食，但我啲方法就比較中國：先買新鮮肥美鰻魚肉，再加鹽、糖、米酒、XO醬撈勻，醃十分鐘，放入滾油炸到鰻魚變金黃色，食落都唔錯。如果想做便當，加塊牛肉餅，用牛油起鑊，加些日本醬料煮熟，跟燒鰻魚一起放在香味白飯上，再配紅蘿蔔，毛豆就睇到都流口水。嘩！食到好飽，打個電話畀老婆傾吓偈先……唉！我都係改唔到壞習慣㗎啦！（二十八）
老大大吉