新世紀論壇嘅核心成員馬逢國、藍鴻震以及陳財喜早前同傳媒午宴，席間八方問退咗休嘅藍爺對新的特首有乜評價？藍爺話，論資排輩，自己的確比煲呔資深（藍爺六六年已經係AO，梗係早煲呔好多啦！）不過，佢都話要讚煲呔勤力同效率高，非一般人可以做得到。
好似開會咁，有時由下晝開到夜晚，十點先至開完，大家攰到死，但係煲呔可以返到屋企重將啲會議紀錄整理好，第二朝叫個秘書提早七點上班，同佢打好份文件，然後畀主席過目修改，大約十點，幾頁紙嘅紀錄已經放喺大家枱面，人人都印象深刻。
藍爺話自己就一定唔得，最快都要等到下晝，而有啲同事更要等幾日，可見煲呔幾搏命。呢啲嘢佢相信曾太幫唔到手，煲呔肯定好夜都唔瞓。
至於肥龍，藍爺就話佢真係橋王，長袖善舞，同各界人士，無論係政界抑或商界，有錢人以及窮人都溝通到，所以同煲呔好合拍。
馬逢國爆人大內幕
藍爺講完一輪，到馬逢國論英雄。馬逢國話，佢可能係老董落台前最後委任嘅一個主席，當時佢都唔察覺有乜異樣，老董重同佢就成立文化創意產業委員會私下見過兩次，𠵱家個委員會煲呔冇再提，身兼藝發局主席嘅馬逢國覺得好可惜。對於有人傳煲呔「倡議」要搞政務助理，開放畀各界人士參加，馬逢國就話未知詳情，好難有反應。
馬逢國亦係全國人大代表，佢話當日老董辭職嘅消息喺兩會傳出，大家冇反應，因為成日有人講，但係一聽到話煲呔有機上位，大家就好緊張。八方聽講有人甚至四出打聽，睇吓有冇彎轉。問佢梁振英個樣係咪好愕然，馬主席都話好難形容，總之出乎眾人意料啦。
新世紀論壇同中方關係密切，八方問佢哋，中央對董曾有乜唔同？答案係：如果你話中央瞓晒身支持老董，咁中央對煲呔係啱就支持，唔啱就未必會留手。煲呔真係要識自己執生喇。
傳真︰2623-9278
電郵︰[email protected]