廣播處前處長張敏儀早前喺上海跌親受傷，不過張大姐夠硬淨，康復進度唔錯。為咗加速復元，大姐非常勤力，噚日（星期日）都去做物理治療，佢話多謝各界朋友關心，經休養後已大致好番。
張敏儀當日俾玻璃門所傷，情況都幾危急，尤其係雙手傷勢最為嚴重，影響到手部活動同日常生活，最慘係連電話都拎唔起嚟聽，但佢交遊廣闊，人人都打電話問候佢，佢惟有忍心唔接電話，等好番先回覆。
張大姐受傷後，暫時謝絕公開活動，原定去英國出席查良鏞接受劍橋大學榮譽院士嘅活動，亦唔能夠出席。八方噚日聽大姐講嘢時中氣十足，相信佢好快就可以重出江湖同老友見面。
傳真︰2623-9278
電郵︰[email protected]