閉關個多月的鄭秀文終於出關，前晚她和杜琪峰在中環撐枱腳，只見她神采飛揚，頻頻甜笑，對記者有問必答，還要求「影我靚啲」，似乎已完全回復自信。Sammi表示她與阿杜亦師亦友，多次強調「我實在太鍾意杜導演，佢開戲我隨時ready」。
鄭秀文（Sammi）去年年尾在上海拍罷關錦鵬電影《長恨歌》後，種種傳言指她患上重病及抑鬱症，她上月中以私人理由臨時缺席在上海舉行的東亞唱片簽約儀式及上海電影節，緊接更誤傳Sammi的「死訊」，雖然其經理人郭啓華否認事件，但Sammi一直未有露面闢謠。
含羞答答
躲藏阿杜身後
銷聲匿迹個多月後，Sammi終於出現，前晚她和導演杜琪峰相約在中環威靈頓街Nabzen日本菜館食晚飯。晚上十一時左右，手持雪茄的阿杜步出食肆，Sammi緊隨其後，兩人站在街頭等保母車。只見Sammi化了淡妝，身穿黑色T恤牛仔褲泥黃色手袋黃色鞋，還圍了頸巾，Sammi氣色不俗，只是臉部還略有些浮腫，記者上前拍照，Sammi顯得有些愕然，更嬌羞地躲在阿杜身後，但面露笑容，表現友善。
問Sammi是否因身體問題而停工，她笑說：「你問杜導演啦，你睇我幾好，冇乜嘢呀，希望杜導演快啲開戲，好希望再同杜導演合作，佢開戲我隨時ready。我實在太鍾意杜導演，總之佢開戲我隨時ready，其他嘢完全冇問題。」
有傳Sammi將會接拍劉偉強執導的《頭文字D》續集做女主角，對此Sammi說：「我唔理係咪有傾過，總之杜導演開戲我隨時ready，佢同我亦師亦友，佢係我恩師。」
心情靚爆
作狀親吻歌迷
問Sammi何時復出，她說：「我復出咗啦，其實之前只係休息一個月，遲啲會去上海配音。」此時阿杜在她耳仔邊問「配咩音」，Sammi用口形回答《長恨歌》，阿杜問「講國語㗎」，Sammi笑着點頭。
此時Sammi突然對記者說：「影我靚啲呀！」記者叫她企定影相，不要躲在阿杜身後，Sammi即合作地任影，記者問Sammi是否只得她和阿杜兩人食飯，她說：「係呀，我哋撐枱腳。」問兩人是否傾開戲的事宜，阿杜說：「唔係，係好耐冇見啫。」
此時餐廳的侍應拿了支清酒送給阿杜，同時有兩、三個女fans上前要求和Sammi影合照，Sammi爽快答應，其中一位女fans問Sammi「你可唔可以錫我」，Sammi即嘟起嘴巴作狀錫對方，其後阿杜的保母車來到，兩人一起上車離開。
文藝片悶
密斟開拍喜劇
記者昨日致電阿杜，他說：「我同Sammi不嬲有通電話，之前傳佢咁多嘢，作為朋友都擔心佢，所以同佢見吓面傾吓偈。佢之前同我拍開嘅係喜劇，拍《長恨歌》文藝片覺得有啲困擾，我分析畀佢聽，我覺得佢可以慢慢適應，佢表現得幾開心，我覺得佢冇乜嘢。」問兩人可會再合作，阿杜說：「想係想再合作，但都要睇題材啱唔啱先可以決定。」
採訪：馮美茵 攝影：何國豪
