露宿者都可以代表香港參與世界盃，絕對唔係講笑，由社區組織協會籌組嘅曙光足球隊，喺嚟緊嘅星期日就會起程去蘇格蘭愛丁堡，代表香港競逐第三屆露宿者世界盃。本地甲組勁旅傑志班球員噚日向曙光球員作即場指導，同埋踢咗場友誼賽，幫佢哋提升狀態。
其實今次曙光能夠成行，背後有好多段感人故事，社協班社工固然排除萬難將夢想付諸實行，善心領隊陳永柏又出錢出力籌集經費，重有班開茶餐廳同體育用品公司嘅街坊出力贊助。不過，最重要都係班曾經露宿嘅球員可以洗心革面，以行動贏得各方面嘅支持。
社協主任何喜華噚日同八方講，一直好鍾意電影《少林足球》，最愛裏面帶出弱勢社群可以企返起身嘅正面訊息，𠵱家佢覺得現實中嘅曙光比起電影內嘅少林足球隊重犀利，比賽輸贏已經係其次。
傳真︰2623-9278
電郵︰[email protected]