用數碼相機嘅一個好處係可以輕易咁喺自己部電腦度睇番相，唔使好似以前咁等至少一個鐘先有相睇，愈來愈多人重要買番部相片打印機，連印相呢個步驟都自己一手包辦。
hp最近推出咗兩部小巧相片打印機Photosmart335（2.5吋芒）同385（3吋芒），重量不足1.2kg，使用另購嘅電池每次充電後可以印到75張相，可以去到邊印到邊，機身上面除咗有多合一讀卡器畀用家將記憶卡裏面嘅相打印出嚟之外，重可以另購藍芽轉接器，咁就可以無線打印手機或者PDA裏面嘅相，非常之方便，機身上面重有彩色螢幕，等你睇清楚至印相，包保唔會印錯。hp同時亦都推出咗一部多合一打印機PSC1410，只係$688嘅價錢就有掃描、打印同影印功能，而且體積小巧，啱晒屋企地方唔大嘅香港用家。
記者：梁瑋瑜