神奇電芯轉換器，可以將3A電當2A電用，但點解唔正正經經買排2A電芯而要呢排轉換器呢？唔明！加埋手絞電筒叉電器、啜手板勞工手套、電風扇原子筆……呢啲發明就好似「太陽能電筒」一樣，無聊得嚟夠爆笑。鴨寮街就有大把呢類得啖笑產品賣，就算唔買，行過睇吓都好開心。接受唔到新事物？對新發明冇興趣？重有大量超平筍貨等緊你嚟尋寶。
記者：馬慶武 攝影：梁細權
Models：Becky、Ken（Salvador）
使用率低 但夠體貼
突然要用2A電，但四周冇便利店冇電器舖，如果呢個時候身上有電芯轉換器就唔使煩喇；戴住勞工手套裝修，發覺拎咩工具上手都跣吓跣吓？換對加有防跣手膠粒嘅新世代勞工手套就幫到手喇；喺荒山野嶺迷路，電筒冇電、手機又冇電，叫天不應叫地又不聞？手動電筒連手機叉電器隨時救番你一命！
——即係咁，雖然遇到上述情況嘅機會好微，之但係鴨寮街嘅街邊檔就係咁體貼！就係咁設想周到！無論實用與否，幾蚊、幾廿蚊買到嘅新發明，可能都會吸引到你買嚟玩吓研究吓，堅決唔買的話，咁就睇吓即場測試啦！
即試新奇發明
嘩嘩嘩！爬柱都掂
傳統勞工手套，揸咩都跣住去，但係啜手板勞工手套就攬咩都咁啜手。你睇！ModelKen戴住呢對手套爬柱都冇跣落嚟，地盤工友必要大量入貨！
喺勞工手套嘅手板位置加上細細粒膠粒，有勞工手套嘅保護作用之餘，拎嘢重唔會跣手，有一定實用性。
「絞」掂！絕境逢生
呢個電筒唔使入電池，只要出力用手絞就可以發光，重具有儲電功能，絞完可以留番啲電必要時先用。兼有一條叉電線接駁「諾記」手機，絞住嚟叉電。
谷唔起！即改用途
路人Micheal親身測試過真係可以2A變3A電後，佢提出咗一個超實用嘅用途——就係用嚟叉充電池，咁咪買一部2A充電機就可以叉勻2A、3A兩種電囉！醒目仔時間喎！
潛落水底！其實係增濕
據老闆講呢件發明係用超聲波令水變成霧氣，可以在夏天開行冷氣時，增加室內濕度咁話！不過增霧器有燈重識變色，好似啱用嚟做裝飾多啲。（昌記電業：23605012）
接收大陸！高層天線
據講可以接收大陸電視台，不過就要喺新界地區或高層地方使用。Model阿Ken之前咁啱買過一個嚟用，佢話搵笨：「莫講話收大陸電視台，當室內天線用都唔係太得喎！」
即睇！鴨記人氣爆燈位
鴨寮街一向都人頭湧湧，但係講到近排聚集最多人嘅攤位，就一定係呢個魔術攤位。由數名Tee加老牛嘅中年漢表演魔術，即場Sell魔術套裝之餘，重有訓練班畀你報名參加。不過就現場所見，細路阿伯都睇得好開心，但就冇乜人幫襯。
平通全港！嚟鴨記掃筍貨
客觀啲，鴨寮街賣嘅新發明其實都有佢嘅存在價值，不過始終都係平貨最吸引、最實際。$30一支可伸縮嘅合金爬山柺杖、$10一把着燈電風扇仔、$2對耳筒綿，重有大量AV、電器配件，定必平通全港。不過買平嘢係需要付出嘅，呢度嘅檔口密麻麻七國咁亂，除咗要行多幾間問價之外，當然重要認清今期激減貨！
$7電筒仔
超光猛嘅白光電筒仔體積重細過3A電，全靠4粒鈕形電池嚟發光，只賣$7。老闆娘話一次買三支重會平一蚊㖭！圖案豹紋、迷彩、格仔樣樣齊，好易襯衫！
$10發光風扇仔
隨扇葉轉動，扇葉上嘅LED燈仔就會轉出不同燈花。類似玩法出現過喺正牌米奇風扇仔身上，不過價錢當然貴幾倍。
$30合金枴杖
三段伸縮爬山柺杖，外形同名廠出品差唔多，價錢卻只係名廠貨十分一！經測試後發覺都相當實淨，阿Ken全身壓晒落去都靠得住，重有好多款好多色。
$2失敗耳筒綿
鴨寮街通街都有$2對嘅耳筒綿賣，記者貪平貪靚買咗一對橙色耳筒綿，點知未笠上個耳筒已經搞到成手橙色，甩色甩得好勁，唔掂！
