其實早有前科，史匹堡與湯告魯斯首度合作的《MinorityReport》已經係麻麻哋，今次撞啱湯告魯斯咁蹺推咗一齣戲於是有個空檔，史匹堡便用幾個月時間趕拍《強》片，所以雖然話就話係世界與外星人的大戰，但畫面見到嘅戰場只係得幾個街口轉角同埋幾塊大空地。
唔明向來同外星人咁friend嘅史匹堡點解突然會勾起條筋將外星人塑造成十惡不赦嘅大壞蛋？唔單止亂咁殺人，重要攞嚟榨汁淋花，重衰過《MarsAttack!》裏面嗰班狗賊火星人。史匹堡拍完《CloseEncountersoftheThirdKind》同埋《E.T.》之後，有人話史同外星人早有聯繫，史係外星人嘅宣傳部長，先為外星人搞好形象，然後外星人才親善訪問地球，在史監製的《MeninBlack》中甚至笑謔史本身便是一個外星人。今次在《強》片中，史突然來個外星人形象大飄移，究竟係因為史同外星人嗌咗交，還是係俾外星人捉咗返去玩弄咗一番，定係現實地、有機心地想種一些恐怖襲擊嘅種子在觀眾心裏？當然，更加可能只不過係搵食，毋須深究。
喺電視上見到靚佬湯呢排嘅行為舉止越嚟越似萬梓哥，相信湯喺拍攝現場都幾惡搞，史一向同開E.T.、大白鯊同埋恐龍打交道，應該唔係好識同難纏嘅大明星溝通，這亦有可能是《強》片草草收場的原因。老實講句，《強戰世界》其實都算好睇，無論係特技嘅設計、鏡頭嘅調度同埋控制觀眾情緒嘅技巧都係一流水準，只不過係因為導演係史匹堡，愛之深，責之切，史匹堡導演係我偶像，所以我期望多好多。最後，最痛心的是，在《強》片中，史的童心買少見少，太認真，不再頑皮了。