講咗好耐有美資大隻佬入股的浪潮國際（8141），上周終於公布同微軟簽署備忘錄，微軟將投資2500萬美元，成為浪潮主要股東。
不過，上周五復牌，股價只係升咗半朝，見過1.25元高位後就好快回落，最低見過0.86元，收0.96元，跌10.28％，成交股數597.6萬股，金額649萬元。
浪潮好消息證實，但股價要倒插，經紀陳就話唔難理解。首先單deal並未落實，重可能有變，現時點搞法仍然未定，況且2500萬美金對微軟嚟講濕濕碎，暫時只係得個名嚇得人，對公司實質幫助仍有待觀察。而微軟買入可換股證券，一旦行使，肯定對現有股東的股權有攤薄效應。而浪潮股價在消息公布前升咗咁多，有人趁好消息出貨實在好正路。
另外，證監會話留意到浪潮公眾持股量，絕大部份係由19個股東揸住，講明係私人派對，普通散戶又點夠膽跟進？
小初諗落亦覺得有啲奇怪，浪潮上市已經一段頗長時間，兼且早輪公司又批過股，點解現時重係得咁少公眾股東？
慕容小初