倫敦恐襲未有為金融市場帶來太大衝擊，外圍主要股市在急挫後瞬即收復失地，港股則走自己的路，繼續調整，上周下跌236點，恒指回落到14000關之下，基本上調整之勢仍會持續，但幅度不會大，13800的支持力可經得考驗。
滙控（005）在外圍一度因恐襲影響而急挫，跌穿120元大關，但港市已能企穩在123元之上，現時大行對滙控的看法，仍以偏好的佔大多數，筆者亦認為滙控已可分段吸納，迎接下半年的大升浪。至於C輪，風險較大，要確認升勢才可入市。
早前已講過，本月下旬有多隻大藍籌C輪到期，相信發行商會做住工夫，所以，大市要升，都要等多一兩個禮拜，等呢批輪計晒數。大市若能守穩13800後再上，一舉而升破14365的阻力，則大升浪開始，由8月開始到年底會係大好市，恒指可見15500至16000。萬一13800守唔住，恒指會落番13500，後市可能要窄幅整固多一段日子。
吉化醞釀大動作
長實（001）的名門已售出逾7成單位，套現50多億元，由於事先張揚要封盤，相人仍有唔少人趕住上車。雖然利率上升，市場亦有唔少聲音話樓價會回落，甚至地產市道會進入熊市，但豪宅的銷情絲毫未見有影響。
事實上，唔少大行都看好大型發展商，例如長實同新地（016），以及擁有龐大商業和零售樓面的九倉（004）和太A（19）等的前景。高盛證券最新報告就指長實上半年物業發展營運表現強勁，故將其06年及07年每股盈利預測，分別調高17.5%及2.6%，至7.04元及7.12元，維持「優於大市」評級，目標價89元。
國企走勢轉弱，暫時可視為升後的正常技術性調整，國指中線仍可向5字頭進發，筆者對早前推介過的上海石化（338）、吉林化工（368）同鞍鋼（347）仍有信心，特別係吉化，應該係有大動作在醞釀中，可逢低吸入。
同芬佬傾開，佢哋話國企股中，要留意埋隻中國鋁業（2600），因為有幾個「芬」已收集好耐，下一個國企升浪，中鋁會係火車頭之一。高盛最新報告亦對中鋁維持正面看法，評級優於大市，目標價6元。
郭兆誠