韓國樂壇小天后BoA，前晚喺首爾奧林匹克主競技場舉行嘅「愛~大韓民國2005i-concert」中擔任表演嘉賓，同型男安七炫、組合god及神話成員MinWoo等，喺台上載歌載舞，令在場五萬fans瘋狂。
勁舞火辣
剛推出咗第五張全新大碟《GirlsonTop》嘅BoA，最近不停出騷增加曝光率，繼上周四喺首爾登村洞體育館為音樂節目《M!Countdown》演出後，前晚佢又再現身。形象愈嚟愈大個女嘅BoA，喺台上表現比一班伴舞嘅男舞蹈員更狂野火辣，令在場男fans睇到眼定定。
而剛剛同BoA去過內地嘅前H.O.T成員安七炫，繼上月尾聯同解散四年嘅H.O.T成員文熙俊、張佑赫、安勝浩（Tony）同李在元，喺韓國首爾舉行嘅「王者歸還」演唱會表演之後，前日喺同一場地出騷一樣大受注目，認真有大將之風。
上個月亦喺「王者歸還」演唱會演出嘅神話成員MinWoo，前晚亦以個人「M」喺台上表演，另一位隊友Hye-Sung亦以個人身份演唱，其間身為當晚司儀嘅隊友Andy同JunJin則上台支持老友。而大會喺演唱會尾聲亦發放煙花，場面非常壯觀。