呢一期最頂癮嘅節目，唔使問都係新的特首接受中央電視台訪問啦。煲呔用普通話向十三億廣大同胞推銷佢個香港夢，八方同公務員界、政界、商界以至順嫂界一講起呢個訪問，佢哋都笑到好似中六合彩咁；唯一可能笑唔出嘅，就係偉大祖國嘅大官小官。
點解？因為煲呔對住中央台個鏡頭，好嚴肅咁話，希望日後退下來嘅時候，大家會評價佢係一個「清官」。好一句「清官」，聽講呢個答案（中央台事先應該畀晒所有問題煲呔睇，等佢準備），係煲呔臨場執生答嘅。大概佢聽完溫家寶總理「士不可以不弘毅」嘅訓勉後，深受感召，所以隨口都噏得出「清官」、「政治家」呢啲詞語。
弊就弊在係人都知中國貪官多，年中都唔知捉幾多。煲呔贈興，你話大陸官場會點睇呢？
傳真︰2623-9278
電郵︰[email protected]