黎姿細佬黎嬰喺銅鑼灣投資過千萬開設嘅皮膚護理中心「HealthMax」噚日開幕，悉心打扮嘅黎姿重同父母一齊撐場，一家四口切蛋糕慶祝，非常熱鬧。黎姿重call埋同佢傳過緋聞嘅龐維新同埋佢太太嚟到賀，幫近日同張栢芝傳緋聞嘅細佬黎嬰護駕。
供書教學作禮物
黎嬰明顯對班傳媒好避忌，佢重拒絕接受傳媒訪問㖭。黎姿護弟心切，就主動同細佬擋駕，話細佬唔係圈中人，唔想好似藝人咁頻頻曝光。
馮仁昭問黎姿有冇送賀禮畀細佬時，佢笑笑口話：「由細到大都有送，因為我一路供書教學，不過佢有咁嘅成就都係靠自己嘅，見到細佬有今日嘅成績，我都好開心！」
𠵱家細佬事業有成，黎姿放下心頭大石啦，唔知世伯同伯母有冇向黎姿催婚？黎姿話：「都有㗎！但我成日拍劇，邊有時間識男仔？記得有次老竇想幫我安排相睇，咁肉酸咁老套，我梗係唔制啦！」
