中環芸芸會所之中，廣東菜以中華總商會會員俱樂部為首選，大概冇乜人會反對。中總嘅粵菜，勝在唔作狀，夠家常，鑊氣好，味道正。呢日在此吃午飯，一味綠豆蓮藕煲排骨，夠晒順喉，左丁山連飲兩碗，順晒。藥王Ｗ剛從突尼斯返來，買咗兩支突尼斯紅酒，送畀大家飲，伴襯秘製鎮江骨，又係幾正斗噃，百零蚊港紙一支，問你去邊度搵。突尼斯位於北非，臨地中海，氣候溫和，以前係法國殖民地，法國人離開後，突尼斯人學曉咗造紅酒，如果大量出口，一定頂死法國平價酒。
與眾人拜拜之後，行經遮打大廈一樓「行人轉運站」（按：北行之人去交易廣場、國金；南行之人去置地廣場、大道中，個個行色匆匆，極少人留低行入Armani，故稱行人轉運站），望到大人物，左丁山識佢，佢唔識左丁山之任總裁，本想搵大人物簽名留念，不過任總裁塊面啱啱側向望西南，睇唔到東北方之左丁山，點敢打擾佢老人家呀，急急避開，是為上策。
行入置地廣場，竟然碰到太陽Ｃ與律師Ｔ，問太陽Ｃ近來所作何事？太陽Ｃ春風滿面咁答：「做啲無中生有之事。」不知何解。不過太陽Ｃ出道不久，便名震華爾街，識得為銀行無本生利，既有此武功，喺屋企對住部電腦便可無中生有，利潤隨至，真係恨死人。左丁山恨不得跟佢學番一招半式，好過寫字寫到手軟。
一諗起寫字，便醒起有稿未交，急急走返辦公室，唔敢跟佢哋去歷山大廈之星巴克飲咖啡。歷山星巴克可能係全港最好生意之星巴克，永遠坐滿人，開着間咁嘅舖頭，收錢收到笑。不過我哋唔恨得咁多嘅嘞，星巴克特許經營權屬美心所有，美心屬置地集團，歷山大廈係置地嘅物業，普通人根本冇得同美心爭，嚟飲杯咖啡算啦。