周杰倫主演嘅電影《頭文字Ｄ》上映十七日，票房已經過咗三千萬，周杰倫第一次擔正主角嘅戲咁收得，當然開心到暈，唔知係咪因為太鍾意部戲，佢竟然一連買咗兩架佢喺片中揸嗰架AE86戰車。
周杰倫喺《頭》片入面嘅係右軚嘅AE86，寰亞為谷宣傳，最近搞咗個網上拍賣，將戲中嘅AE86戰車攞出嚟競投。
周杰倫最少出過八次價，最後佢以五十一萬二千港元投得，另外，佢上個月又喺台灣搵到另一部左軚嘅AE86，車價約十萬港紙，日前佢重借咗呢架車畀台灣組合南拳媽媽拍ＭＶ㖭！
租車場擺收藏品
我馮仁昭覺得周杰倫真係好誇張，一買就買兩部戰車，佢向來鍾意收藏古董車，之前珍藏嘅古董車已經有十幾架，啲車多到要租個停車場嚟擺，查實佢啲車真係攞嚟擺多個攞嚟揸，平時最大嘅用處睇怕係攞嚟拍ＭＶ。