達明一派組隊二十年來，風格別樹一幟，甚至有過偏鋒時期，能在樂壇生存至今絕非易事，明哥對此笑說：「有乜事係唔難㗎，一步登天咩？」劉以達也說：「咁易點得世間財呀？」明哥補充說：「雖然我哋捱過苦都冇得世間財，但仍然可以繼續玩，唔使乞食都好感謝，好好彩啦，遇到好多人都肯互相扶持，好似『人山人海』，唔係睇錢都做到呢樣嘢，對樂壇都有少少衝擊。」
棄電影攻音樂
問達明再次組隊有沒有賺到錢？劉以達望着明哥笑說：「佢係老闆嚟㗎，有『人山人海』。」明哥即笑道：「一路都好好彩，出品亦有人買，keep到基本營運，但唔覺𠵱家上咗岸，不過辛苦得嚟都好玩，都賺到啲，唔通貼錢返工咩？係就係冇乜錢賺㗎。」劉以達即搭訕說：「唔會發達囉。」
劉以達揚言組隊以來最難捱的時刻，正是轉型拍電影，他說：「因為拍戲同做音樂好唔同，勢估唔到自己會拍戲，重要走去拍喜劇。」明哥聞言便撐拍檔說：「拍喜劇都係工作，又唔係偷唔係搶。」
其實達明一派曾合作拍電影《戀愛季節》，明哥單飛拍攝的大概有十部，他笑說：「票房毒藥嚟㗎，講笑啫。我諗拍嘅戲唔過十部，但拍戲唔係自己最專長，近呢十年都冇拍，因為自己鍾意音樂多啲。」至於劉以達暫時也沒打算拍片，他說：「做達明就冇時間㗎啦，其實拍戲做笑片，聽到人哋嘅笑聲，帶畀人哋歡樂，醜化都冇乜唔妥，所以我唔介意。」
採訪：朱倬誼
攝影：林德雄
部份服裝提供：DAKS
場地：明珠酒樓