遠東發展（035）嚟緊星期三公布05年度（3月止）業績，提早炒埋06年度業績都重得。遠展去年度把握好時機，放售香港物業獲利，即將公布業績，預期純利3.5億至4億銀，PE落番11倍，冇問題。
上月下旬，遠展佔5%嘅美國曼克頓上城區地產項目，已經訂立協議出售，售價137億元，呢鋪遠展真真肥仔。以遠展所佔權益，套現6.8億港元，成本不過6954萬元，應該穩賺6億元，計計數，等如遠展2000伙上海加州花園（假定每伙賺30萬元）嘅利潤。遠展大早計劃，手頭5000伙上海加州花園，今年開始推售，市場計數，上海項目年淨賺3億至4億銀，總利潤15億至20億銀。雖然，上海項目部分地段會改建獨立別墅，但亦大致睇到，美國地產項目利潤，達到上海項目3至4成總利潤比重，當好多祖國物業股硬食宏調撼地，遠展有花旗項目墊底，06年度PE進一步落到7倍，以上番10倍計，股價4.28元，見3蚊可以兜底。
渝港短炒無妨
渝港（613）對上星期五，啱啱test完短期橫行底0.116元，支持力唔錯，又講兩點：第一，渝港透過旗下渝太地產（075）揸住本港地產項目，絕大部份係投資物業，包括尖咀彩星、新文華中心及中環世紀廣場。本港零售市道好轉，租戶搵靚舖，插針唔入，渝港係贏家。
第二，渝港系屬收租股，加埋隻股淨現金5.6億銀，現價（0.119元）56%淨現金比重，避風力特強。渝港彈番上短期橫行頂0.136元，潛在升幅14%，短炒無妨，但隻股已發行84億股，唔嘢少，若有任何股本重組動作，長揸怕途中有震盪。
錢雋