古巨基、周麗淇、曹敏莉、胡杏兒、郭可盈以及三位港姐徐子珊、朱慧敏及符思思等，前晚盛裝出席位於又一城的「HAIR」髮型屋開幕派對。
老闆親自配襯
與髮型屋老闆相識多年的古巨基，前晚以藍色皮褸及牛仔褲打扮現身，基仔透露一身打扮是由髮型屋老闆為他配襯，基仔說：「我出道九年以嚟，都係佢幫我設計髮型，演唱會嘅造型都係佢一手包辦，我唔識做生意，不過如果朋友做開嘅生意搵我入股，我都有興趣嘅。」
另一方面，基仔昨日出席在數碼港舉行的遊戲活動，他表示其公仔Kubi獲遊戲商及日本漫畫商睇中，基仔說：「有遊戲公司想將Kubi出隻電子遊戲，但係我冇時間去搞。由初出到𠵱家Kubi都賺咗七位數字，𠵱家算係播種期，將來我食粥食飯都係靠晒佢。」提到被傳與女助手結婚，基仔說：「我想等Kubi有番咁上下成績先，𠵱家湊住個仔，幫個仔搵到阿媽先結啦！」
此外，近日有周刊指周麗淇拍攝《天幕下的戀人》期間與女導演態度親暱，又經常在拍攝現場玩耍，令同場另一演員羅敏莊呆等，對此周麗淇前晚在派對上說：「有羅敏莊嘅戲份係另一個導演拍嘅，總之我同男女朋友都一樣咁投契，亦明白啲雜誌要交功課。」
三點式拍廣告
至於曹敏莉及胡杏兒則齊齊以性感的打扮現身派對，胡杏兒現正忙於拍攝無綫新劇《亂世佳人》，她說：「我𠵱家戴住呢個係假髮，頭先啱啱拆咗個古裝頭趕嚟，我其實最想試吓剪陸軍裝。」曹敏莉則透露稍後會以三點式泳裝接拍纖體廣告，她說：「簽咗約擔任纖體代言人一年，對自己着泳裝都有信心嘅。」
採訪：卓寶花、卓美娟
攝影：葉君海
