達明一派最近推出新碟，其中有首歌叫《假大空》，明哥解釋以前共產黨常用這個詞語，意思是空談。談到香港「假大空」，明哥說：「香港嘅假大空，好似話西九龍（興建多用途文娛中心）係提升香港流行音樂文化囉。香港開演唱會嘅地方只得紅館，一嚟就紅館，外國歌手經過好多細場表演嚟磨練，坐一百人、一千人、二千人，香港缺乏唱現場嘅場地。外國歌手出碟要去唔同嘅場地、酒吧唱幾十場，香港有啲人覺得咁係貶低自己嘅身價，乜都要撐到最好。」
籲政府資助後進
明哥續說：「香港嘅音樂文化係要做好設施，唔係乜嘢都要最大，要由細砌出來，希望政府資助後生仔學音樂，因為有好多學生想學，但屋企畀唔起錢，買個大提琴好貴，政府肯資助，香港咪會有多啲大提琴手囉。」
對於時下偶像歌手演唱欠水準、唱片銷量又不濟、唱片公司買少見少，樂壇境況日益嚴峻。達明一派固然夠份量談論這個現象，劉以達先說：「𠵱家大部份都係偶像派組合或歌手，成個樂壇得呢樣嘢，好似一面倒，樂迷冇得選擇，其實有好多類型嘅音樂，但冇得提倡。」
明哥則另有見解，他說：「我諗當啲嘢去到最壞嘅時候會反彈，好多現象都係咁，最近氣候好番啲，大家想聽唔同嘅歌，橫掂做乜銷量都差唔多，咁不如絕地求生，K唔K歌都差得唔遠，不如做番啲開心嘢重好。」
讚Eason祖兒歌藝
明哥又說：「我唔憎K歌，只係憎得一個K歌嘅樂壇，我自己都會唱吓K，但其他嘢都要兼顧。樂壇可以有唔同嘅音樂共存，咁會健康啲。」問達明覺得新一代歌手中哪位唱得有水準？明哥認真地說：「Eason（陳奕迅）係一個現場表演幾好嘅歌手，Joey（容祖兒）唱現場都好，Soler、at17都好。其實都係經驗問題，冇乜機會唱現場，就會好怯場。」