收到一批讀者電郵，一啲不妨答覆一下。
（一）讀者問《常誤詞語辨正》一書何處可以買到。該書作者容若，明窗出版社二○○一年四月出版，書局應該有售。
（二）一位讀者C.K.傳來一頁《塘西花月痕（下）》，第四十八、四十九頁，講及何謂「六○六」。呢本書左丁山未睇過，但知「六○六」為何物，多謝C.K.指教。
（三）讀者馬抗議高官要香港電台取消賽馬節目，抗議曾特首指點港台。你嘅意見同好多馬迷一樣，不過我哋把聲加埋，唔及三個大官（曾蔭權、許司長、曾局長），冇話好講。
（四）讀者心急人話兒子在英國得化學工程碩士，繼續在大學做研究，但佢好想兒子去澳洲讀MBA或轉讀藥劑學，問左丁山有乜意見。左丁山認為你個仔已經二十幾歲，應該由佢自己揀，英美國家學生，讀化學工程嘅唔多，美國大學啲化工博士課程，全以中國及亞洲學生為主，啲大化工公司幾需要人，你位公子唔使轉行啫，好嘅化工人才，搵工唔難噃。
（五）繼續有讀者問在馬會擺結婚酒，如係會員，請與會籍部聯絡；如非會員，可打電話29668588查詢詳情。左丁山個人就認為沙田馬會會所相當唔錯，只怕賓客覺得交通不便，口出怨言。
（六）讀者Superman問「一個人會升職到一個他不能勝任的位職」，
是甚麼理論？此乃Peter'sPrinciple，由LaurencePeter提出。
（七）程小姐問「健康即食麵」牌子，不便講，到大超級市場搵吓就有。
（八）唔少人再問糖尿病與苦瓜乾及Ｌ教授。飲苦瓜乾煲水有助降血糖，至於Ｌ教授係極忙碌人士，去公立醫院排隊，好少機會見到佢，坊間有好多醫生啫，請稍安無躁。