講到呢兩年最紅嘅男歌手就非古巨基莫屬，基仔唱得好就係人都知，估唔到呢個《古巨基05勁歌．金曲演唱會》裏面佢重喺視覺上畀到觀眾好多驚喜，大家都知道基仔係一個打機同漫畫迷，所以佢就喺裏面用咗好多動漫人物嚟做題材，甚至連佢嘅造型都好有CosplayFeel，有得聽又有得睇，冇去睇演唱會？唔緊要，嗱嗱聲買番隻DVD返嚟睇啦！
記者：梁瑋瑜
《古巨基05勁歌．金曲演唱會》由於反應太好，場場爆滿之餘，門票重喺短短幾個鐘內賣晒！所以演唱會分別喺3月同埋4月分成兩部份舉行。今次DVD版玩孖碟裝，除咗演唱會之外重加送製作花絮，可以揀聽現場版本或者卡拉OK版唱餐飽，音效方面支援杜比立體聲同埋6.1，記者試聽過之後音質非常唔錯，基仔把靚聲同埋現場樂隊都原汁原味俾大家聽出耳油！
四大必睇位
雖然個演唱會每一分鐘都係精采，不過總有啲位係值得一睇再睇嘅，記者就揀咗四個位推介畀大家，千祈唔好錯過。不過事先聲明，一心想睇古巨基喊嘅朋友可能會失望，因為呢隻DVD係收錄咗基仔冇喊嘅一場，唔知係咪基仔想為佢「喊包」呢個形象洗一洗底呢？
勇闖舞林
印象中基仔從未為佢嘅歌排過舞，今次演唱會為咗表示佢嘅誠意，特別為到《史上最強漫畫王大亂鬥》同埋翻唱羅文嘅《波斯貓》排咗兩隻舞，睇得出下過一番苦功。
四重和音
演唱會裏面四位唱和音嘅Chorus表現非常出色，令到演唱會生色不少，而基仔喺佢哋嘅和音之下由《大雄》過渡到王菲嘅《夢中人》又係一大驚喜，呢個位抵讚！
勁歌金曲加心路歷程
大家去卡啦OK唱完成首《勁歌金曲》，恐怕都得番半條命，睇下古巨基現場唱足本《勁歌金曲》，完全係面不改容，呢啲咪就係功力囉！再加後段基仔自爆11年演藝生涯心路歷程，必睇！
製作花絮
Bonus嘅製作花絮雖然都剪輯咗好多演唱會片段，不過基仔嘅練歌練舞、服裝設計藍圖、舞台布置再加上慶功宴嘅片段，就算你現場睇過演唱會，都可以包你未睇過。
基仔搶眼造型大公開
藍寶石王子Look
藍色頭髮加上成身閃石，重唔係藍寶石王子駕到？
小紅帽Look
基仔將件紅色閃閃斗篷由頭包到腳，重加埋魚網手襪，夠晒「美豔」。
DevilMayCryLook
睇落好似DevilMayCry嘅造型，一頭白髮加上全身紅黑打扮，型到震。
DVDPro（23326326）
旺角乃路臣街6E德發商場地庫B4舖