煲呔上場，三司十一局都要醒定啲，以前佢做政務司司長嗰陣時，已經成日以政務司司長身份，同啲同事喺部長樓開早禱會（morningprayer)。𠵱家煲呔做咗特首，就更加勤力，朝朝早喺政府總部五樓，同班手下開會，共商大事。
有個咁搏命嘅老細，大家梗係要醒定啲，詩姐姐本來同煲呔最啱key，因為佢出晒名勤力，成個律政司都知道。不過，佢阿姐就已萌去意，煲呔都未必留得到佢。相對於詩姐姐，肥平就被認定懶好多，當然呢個係以煲呔作為標準啦。
少食多做當減肥
早前有人傳，煲呔想飛走肥平，肯定唔係空穴來風，不過後嚟中央唔准換人，肥平執到啦。
八方估肥平亦收到風，有人傳佢喺中方人士面前，擔心到想喊，希望保住自己嗰位。雖然𠲖家嗰位保得住，但都要有啲表現，早前佢收到料，知道中央想將奧運馬術項目，交由香港主辦，所以最近肥平頻頻出鏡，做吓實務，以示勤力。
呢次國際奧委會畀馬術喺香港舉行，肥平得咗唔少分，相信佢俾煲呔「叮」走嘅機會細咗好多，雖然呢排佢食少咗，又做多咗，咪當減肥囉！其實，佢收成三百幾萬年薪，都唔可能只係識飲飲食食，剪剪綵，耍耍太極、求求其就收工。
爆料熱線：29290000、27860099
報料傳真：26239278
報料電郵：[email protected]