美國女歌手瑪麗嘉兒（MariahCarey）雖然近年鹹魚翻生，但佢嘅家人就問題多多，佢嗰位患有愛滋病嘅家姐艾莉遜嘉兒（AlisonCarey），最近就因涉嫌賣淫，第二次遭警方拘捕。
現年四十三歲嘅艾莉遜，上個月十三號喺紐約長島嘅碼頭兜客，當時一名放蛇警員扮晒脂粉客向艾莉遜搭訕。警方發言人話：「那日艾莉遜表示可以二百五十美元（約一千九百港元）進行性交易。」故即時拘捕她。
其實艾莉遜喺今年四月已經因賣淫而被捕，上月承認控罪重罰咗二百美元（約一千六百港元）。點知喺十一日後，艾莉遜又重施故技，不過佢日前喺初步聆訊中就唔認罪，下個月再上庭受審，紐約警方表示艾莉遜可能要踎三個月監。
家庭關係惡劣
原來艾莉遜一向同瑪麗等家人關係唔係太好，佢好細個結婚，十八歲生第一個仔Shawn，但由於佢染上毒癮，又以賣淫為生，所以佢阿媽就攞咗外孫Shawn嘅撫養權。十年後，艾莉遜生咗第二個仔Michael，之後就證實感染愛滋病，搞到瑪麗同佢阿媽又再勞心勞力，花咗唔少時間同金錢去爭取Michael嘅撫養權。不過，艾莉遜曾經喺訪問中自爆曾以賣淫賺嚟嘅錢幫瑪麗走紅。