新MCPC全遙控操作AV電腦

好多影視名人都係IT玩家，數碼相機、DC同電腦呢類IT產品，好多已經成為生活一部份，為咗令IT產品簡單融入生活，hp新推Pavilion系列的「數碼娛樂中心電腦」（MCPC），話到明要改變一般人用電腦方式，記者會上就請來向有生活品味嘅任達華試用新機，睇睇如何「享受」電腦！
記者：許福合
攝影：陳智良

hp今次推出呢套數碼娛樂中心，其實與一般電腦最大分別，係一個「軟」字，所採用系統為《WinXPMediaCenterEdition2005》，能讓用家以簡單操作、單一介面，做到各種AV功能，而今次hp更與微軟有個優先協議，能夠搶先推出以MCPC為平台嘅Desktop，即使其他電腦品牌，分分鐘要幾個月後才有同類產品面世，認真威晒！

AV/電腦功能二合一

今次hpMCPC發布會上，請來名人任達華試用呢部新機，其中最令人印象深刻定要數操作方面，同一般電腦唔同，MCPC全部操作可靠晒一個遙控器！當進入主畫面，只須㩒上下掣，就可以直接開啟睇相、聽歌、電視等等各項功能，連通訊軟件《MSNMessager》，都可以用遙控鍵入英文對話，真係可以完全飛走鍵盤。
試用時，任達華就分享咗佢最近拍嘅靚靚花花相片，利用MCPC介面，進入Photo後，就可以見到相片分門別類放置，並且提供有預覽圖示，一睇就知想搵嘅相片喺邊，而且連隨駁埋Printer將相片印出來，都只係1、2分鐘內完成。除此之外，新機還備有LightScribe技術嘅雙層燒錄DVD機，可燒雙倍（8.5GB）容量，連碟面都可印上圖案，即使一般AV機都無咁多嘢玩，而且以上咁多功能，都只係一機一遙控就搞掂，簡單方便。

■可以經無線網絡接駁Printer，立即印任達華張靚相。

■全MCPC所有功能都可以靠晒遙控。

■機身前嘅9合1讀卡器，主流記憶卡都讀到。

■因為只要使用遙控操作，要選擇合適位置放接收器。

PentiumD玩多工種勁爽

除咗軟件係新嘢，硬件嘅支援亦都好夠份量，最要強調當然係用上Intel最新PentiumD830處理器，內置雙核心製程，就好似有分身一樣，等同兩粒U同時操作，而且具備64bit支援，能使用更多「大咬」軟件。筆者試用時，發現MCPC與PentiumD簡直係完美配搭，即使同時進行多個工作，都唔覺窒住窒住，好似當睇緊電視，又可轉去睇DVD，同時將電視錄影，睇DVD到一半轉去睇相，一樣可保持流暢。
要錄影，又要放咁多資料，硬碟當然唔「小」得，內置一個200GB高速硬碟，當啟動錄影時嘅TimeShifting邊錄邊睇功能，畫面都唔覺受到任何影響。硬體夠勁亦可讓用家享受到更高質畫面，能有足夠Power支援播放1080i及1080p等HDTV格式，論功能同質素，與一般AV機相比亦唔會輸蝕！