建滔化工（148）在減咗兩次價後，終於完成先舊後新配股，雖然係銀碼少咗，但仍然有成8.9億銀，喺咁嘅時勢都搞得掂，真係飲得杯落。
至於下周一復牌股價表現，相對已經唔係咁重要，估計配股價應該守得住。
經紀黃話，建滔今次落實以每股22.25元配股，比起停牌前收市價25元，折讓11％，復牌初段有沽壓，實在好難避免。
除咗建滔外，基金股福記（1175）昨日亦有大手成交上板，市傳係歐資策略性股東減持，但據講都係芬佬射貨畀芬佬，所以對股價無影響。
福記昨日的大手成交，每股造6.50元，涉及1800萬股，計落成1.17億元。福記昨日股價一度跌至6.40元，最後收6.75元，無起跌，計埋大手成交，成交股數1961.6萬股，金額1.28億元。
經紀黃話，其實策略性股東減持，並唔係一定睇淡公司前景，因為呢類上市前入股的股東，通常在股價升到咁上下都會沽貨獲利，實在無可厚非，而接貨者又係芬佬，股價亦穩定，照計唔會有大問題。
慕容小初