周星馳上月獲美國暢銷雜誌《People》選為「全球熱爆王老五排行榜五十大」之一，重係唯一入選嘅東方人。呢位熱爆王老五前晚就撇甩女友于文鳳，同三位男性朋友去灣仔佳寧娜食晚飯，飯後星爺坐朋友嘅寶馬遊車河，跟住再去咗銅鑼灣伊利沙伯大廈樓上、一間有靚女陪坐嘅私人會所消遣，睇嚟佢嘅節目確係愈夜愈精采。
各自往私人會所
前晚十點幾，留咗一臉鬚渣、長髮及肩嘅星爺戴住頂鴨舌帽，着住印有星形圖案嘅T恤同星形logo波鞋，同三個男性朋友一齊步出食肆，四位猛男喺商場傾緊下場嘅時候，其中一位朋友好熱情咁拉住星爺上咗一部寶馬遊車河，但架車喺附近兜咗一個圈之後，星爺又突然落車，坐番自己架保母車，同三個朋友分頭去私人會所。
星爺到咗伊利沙伯大廈門口，一落車就成支箭咁衝上樓，直到將近凌晨一點，星爺至好開心咁落番嚟，上咗保母車返歸休息。
馮仁昭知道呢間私人會所有不少北方佳麗穿梭與客人唱歌猜枚，唔少城中名人富商都係常客，所以會所保安嚴密，要由經理介紹至可以入場。前晚星爺上樓之後，亦陸續有啲打扮性感、講普通話嘅北方佳麗喺會所夜半穿梭，唔知以星爺熱爆王老五嘅身份，會唔會迷倒場中嘅北方佳麗呢？
