老友Ｔ教仔女學中文，居然剪存左丁山講《曾特首之祖訓》（六月二十八日），教仔女讀，大仔升中二，細女升小五，都唔知有冇興趣。左丁山對老友Ｔ講：「老老實實，要仔女學中文，最好就係讀董橋專欄與陶傑《黃金冒險號》，學乎其上，得乎其中都好吖。教仔女睇左丁山呢啲旁門左道，驚學壞師喎，學校作文寫幾句廣東話，先生會扣分啫！」老友Ｔ話：「你有所不知，佢兩隻嘢材料有限，點睇得明董橋講辜鴻銘以及陶傑講在地中海食木瓜加青檸檬，你偶然講吓士不可以不弘毅呢類淺白文言文，佢兩個用心機睇，明㗎！」
既然如此，學壞中文唔關我事。老友Ｔ嘅千金，在名校讀書，以前經常俾先生批評到喊，名校之英文課本，艱深過人，完全唔係左丁山舊時讀Amanandapan嗰款。老友Ｔ諗咗好耐，搵咗一位英文補習老師替愛女補習，老師上完第一堂就話：「你個女唔係唔識，不過冇信心啫，我會培養佢嘅信心。」
咦，補咗一個月，小女孩要考試嘞，媽媽諗起上次考試愛女驚到瞓唔着，點知呢一趟完全唔同，個女考試前一晚重識跳跳紮，驚都未驚過。考完英文返嚟，媽咪急忙安慰，恐怕佢會喊，愛女話：「媽咪，我實會及格，四十分我諗住要攞到三十六分！」咁醒，分數都計到？派卷之後，乖女得二十七分，成家開心晒。老友Ｔ捉住補習先生問：「你有乜絕招教咗我個女？」老師話：「簡單到極，我日日叫佢溫一次上堂教過嘅課文，然後讚佢叻女，話佢做得好好，如果咁咁咁咁改善啲，一定會更加好！讚得多，佢恢復晒信心，就唔怕先生批評啦！」
原來咁簡單。背後嘅道理就係唔好下下窒住，嚇怕啲細路。呢個係美國方法，肥仔Ｋ在學校做兼職英文tutor之前，學校畀佢嘅一個指引就係唔准鬧學生呢樣錯、嗰樣錯。