倫敦遇襲後，歐洲金融市場一度大混亂，但美股就出奇地理性，先跌後升。港股噚日初段保持平穩，中段過後沽盤再臨，相信是芬佬照原定計劃減磅有關，唔關恐怖襲擊事。恒指收報13964，跌66點，成交168.55億元。接近收市前，又傳出倫敦有車站發現可疑包裹需要疏散的消息，但市場對此已無甚反應。
今次芬佬主要是減持國內股份，中移動（941）再跌1%至27.55元，中海油（883）因退出洽購澳洲天然氣項目洽談，股價再跌2%。中海發展（1138）跌2.8%至5.20元。
不過，航空股沽壓放緩，東航（670）靠穩，收1.24元無起跌，南航（1055）更反彈3.6%，由於情況未明朗，國內航空股暫時好難話跌完未，至於國泰（293），有消息話受到油價高企影響，5-6月的營運已經冇錢賺。若油價持續高企，航空股隨時要發盈警。
浪潮（8141）公布獲微軟簽備忘錄投資該公司1.95億元，並可能成為公司主要股東（擁有投票權上限為28%），甚至有可能須提全購。
證監「將軍」浪潮急退
消息一出，股價一度急升至1.25元，可惜無買盤跟進，股價最終倒跌10.28%至0.96元。原來同一時間，證監會將佢軍，話公司94.76%股權集中在22名股東手上，即係貨源歸晒邊。如此格局下，高追風險大，加上此股交投稀疏，最驚就係接咗貨後落車無門。
阿虎